يسعد صباحكم ومساكم بكل خير .. 💕
كيفكم بنات
تدوينة اليوم عن تعطير الشعر و العطور اللي جربتها و تبخير الشعر.
قبل تعطير الشعر، مافيه مثل البخور من تجربتي 😍.
و مايمنع طبعاً من تغيير الريحه.
بالنسبه لطريقتي، البخور اول شي وبعدها دهن عود و بعدين العطر احط كم رشه على شعري اذا تعطرت ( مو عطر شعر ) ومرتاحه على هالطريقه و الريحه ثابته و فواحه جداً، و احياناً اذا مستعجله يكفيني العطر ودهن العود بدون بخور.😍
بعض النصائح قبل تعطير و تبخير الشعر :
الأفضل تعطيره و تبخيره و هو بين المبلل و الناشف هالطريقه تخليه يدوم لفتره أطول.
اللي تستشور او تستخدم الفير بعد ماتخلصون عطروا شعوركم وبخروها مو قبل.
لا ترشون العطر من فوق جهة الفروه، عالاطراف و منتصف الشعر يكفي.
أما بخصوص تدوينة اليوم فـ هي عن عطر الشعر مادموزيل من شانيل، شفت مدح كثير عليه و بقولكم تجربتي معه.
العطر ريحته فريش و جميله. 💕💕
أهم النوتات فيه:
الحمضيات
الباتشولي
الروز
بحكم انه عطر مخصص للشعر ف طبيعي ان تركيزه بيكون خفيف، بس بعد استخدامي له طلع بزياده خفيف. يعني الريحه اشمها اول ما ارشه بس وتختفي على طول. مو ثابت و لا فواح ابداً. 💔
بالنسبه للي يقولون العطر يطلع شيب، انا الحمدلله من زمان اعطر شعري و ماطلع لي شيب ابداً.
ماراح ارجع اشتريه، ريحته جميله ولكن خفيفه و مو ثابته نهائياً و هذا اللي ماحبيته.
سعره تقريباً ٢٣٠ ريال ٣٥ مل
اخذته من وجوه.
اكتبوا لي تجاربكم مع عطور الشعر 💕
