يسعد مساكم و صباحكم .. 💜

ان شاءالله انكم طيبين وبكل خير ..

تدوينة اليوم ان شاءالله بتكون عن سيروم البشره الليلي و كريم ترطيب العيون Midnight Recovery من كيلز.

هالسيروم سوى ضجه و كثير تكلموا عنه البلوقرز الاجانب و من فتره بدأت محلات كيلز تفتح بالسعوديه و صار متوفر عندنا.

عباره عن زيت خفيف جداً اشبه بالمويه، يُستخدم بالليل قبل النوم. وظيفته الاصلاح الليلي للبشره المرهقه و الواضح عليها آثار التعب و السهر بحيث بالصباح البشره تكون أكثر نضاره و صحيه.

أهم المكونات فيه ( كلها طبيعيه ):

زيت اللاڤندر أو الخزامى : يساعد على الاسترخاء و يهدي البشره بشكل ملحوظ خصوصاً البشره الملتهبه. ( ريحته واضحه جداً بالسيروم ) 💜

زيت زهرة الربيع : يساعد على إصلاح البشره و اعادة حيويتها.

السكوالين : زيوت نباتيه طبيعيه لترميم البشره.

و الأهم انه خالي من العطور و البارابين.

وعود المنتج:

 اعادة الحيويه و النضاره للبشره. و فعلاً هالشي شفته. حسيت بشرتي الصباح فيها نضاره مظهرها صحي

😍 المنتج مو علاجي. المقصد انه مايعالج الحبوب او الاثار او المسام او غيرها من مشاكل البشره. المنتج يعطي البشره مظهر صحي و حيوي.

طبيعة بشرتي مختلطه، التي زون دهني. ناسبني السيروم لانه مو دهني بحت. تمتصه البشره بسرعه مايبقى اثر زيت. 👌

زي ما هو واضح بالصوره، قوامه خفيف جداً.

طريقة الاستخدام:

بعد ما انظف بشرتي قبل النوم، احط بالقطاره ٣ الى ٤ قطرات في يدي و ابدأ اطبطب على وجهي مع شوية تدليك.

و ابعد عن منطقة العيون.

- العلبه 50 مل  الحجم الكبير و فيه حجم اصغر منه، ولكن تكفي لوقت طويل من الاستخدام بحيث انك ماتستخدمين في كل مره الا كم قطره.

هنا تجربة وحده اخذتها من النت قبل و بعد استخدام المنتج، بشرتها صار فيها نضاره و صحه 😍

- غطاء العلبه على شكل قطاره.

- المنتج ممكن تاخذونه من محلات كيلز متوفر في الرياض و الخبر.

او ممكن تطلبونه من موقع أناس. منتجات كيلز متوفره عندهم.

- سعر السيروم تقريباً اخذته ب ٣٤٠ او ٣٥٠ ريال.

ننتقل لكريم ترطيب العيون من نفس خط ال Midnight Recovery.

مخصص لمنطقة تحت العيون. و لانهم من نفس الخط راح يعطي نفس النتايج.

مكوناته نفس مكونات سيروم الوجه الزيت الأساسي فيه هو زيت اللاڤندر او الخزامى.

و باقي المكونات كلها طبيعيه.

قوامه كريمي خفيف.

وعود المنتج:

 يعطي منطقة حول العيون مظهر صحي  ويخفف من آثار التعب و يخفف من الهالات اللي تطلع بسبب السهر. 👌

العلبه سعتها 15 مل، على شكل عصار. و أكيد ماراح تحتاجين كميه كبيره. العصار حسيته يساعد اني مااخذ الا الكميه المناسبه مو اكثر.

بالنسبه لي، هالاتي خفيفه تقريباً. بس حبيت اني اخذه عشان استخدمهم سوا و عشان الترطيب بنفس الوقت. 

طريقة الاستخدام:

على بشره نظيفه، بعد مااستخدم السيروم احط من الكريم على اصبعي بكميه قليله وابدأ اطبطب منطقة حول العين.

بس انتبهوا ما يجي الكريم عند الرموش.

اللي لاحظته او النتيجه:

الهالات اللي تطلع من السهر خفت بشكل كبير. اثار التعب بدت تخف. ترطيبه يعتبر ممتاز بالنسبه لي، خفيف و مايدبق.

- يناسب اكثر منطقة العيون اللي مافيها هالات كثير او مشاكل.

- ممكن تحطون اكثر من طبقه لللي المنطقه عندهم جافه.

- بما انه كريمي خفيف، راح تمتصه البشره بسرعه.

- سعره تقريباً ١٨٠ ريال. 💜

و بس هذا موضوع اليوم ،اتمنى تكونون استفدتوا. 💕

اذا عندكم اي سؤال اكتبوا لي بالكومنت. 💕